Misminni um húsráð

Mér hljóta að hafa orðið á mistök því einn morguninn vaknaði ég með bakið límt með tyggjói við lakið á rúminu. Ég notaði terpentínu til að ná tyggjóinu úr lakinu og var óspör á hana. Nú hefur lakið verið þvegið tvívegis við 60 gráður á Celsíus, sem er ráðlagður hámarkshiti í tilviki þessa laks. Mikið af þvottaefni er nú á leið til sjávar. Hreinsun á tyggjói tókst mjög vel, ekki er arða af því sjáanleg en terpentínufnykurinn af lakinu er svo yfirgengilegur að mér liggur við öngviti. Svona lagað kemur auðvitað ekki fyrir gömul og ljót lök.

Lekur svartur gúmmíhanski

Ef til stendur að þvo upp og grunur leikur á að gúmmíhanski leki, þá er einfalt að athuga það með því að fara í hann og stinga síðan lúkunni undir heitu bununa. Ekki get ég mælt með þeirri aðferð.

Skrímsli á Íslandi

Hvernig drepur maður Spánarsnigil? Því hefur ekki verið svarað. Það er sennilega svipað því að stíga ofan á banana að ætla að trampa hann í hel. Ætli verði ekki að skjóta hann.

Spánarsnigillinn á baksíðu Moggans í dag er meira en 10 cm langur og eftir því gildur. Aumingjagæska mín er alltumfaðmandi, en nær ekki til Spánarsnigla. Þeir munu ekki kemba hærurnar í mínum garði.

Allur matur á að fara

Í gær tók ég reglulega vel til í ísskápnum. Þetta er rétt er að umorða. Ég flutti þaðan og í tunnuna matvæli sem láðst hafði að snæða, til að rýma fyrir samskonar matvælum, nýkeyptum. Mér leið eins og ég hefði syndgað gegn mannkyni og móður jörð í einni aðgerð. Koltvísýringur, hlýnun jarðar, ofvaxnir ruslahaugar og sveltandi fólk. Ég iðrast og mig langar til að bæta ráð mitt.

Sumir halda því fram að eina leiðin til að hemja sig í kjörbúðum sé að fara ævinlega þangað með innkaupalista og þá helst fyrir vikuna. Trúlega er betra að fara í verslun með lista yfir þann mat sem nýlega hefur verið hent. Nú get ég sett á þann lista pítusósu, samlokubrauð, sólblómabrauð, grænt pestó, kúrbít, lime, skyr, mjólk, léttmjólk, fjörmjólk, soyamjólk og jógúrt.

Eins getur verið gagnlegt að endurskilgreina hugtakið "verð". Taka má dæmi um skinkusneiðar seldar í bréfum. (Hvaðan kemur þetta rugl um skinkubréf? Þau eru plast.) Á skinkuplastið er prentað útsöluverð per kíló en að teknu tilliti til þess að skinkuplöstum er gjarnan hent ásamt seinni helmingnum af skinkusneiðunum, kemur í ljós að kílóverð étinnar skinku er kr. 6.000.
Bretar segjast henda einum þriðja af matnum sem þeir kaupa í tunnuna. Ég hef verið meira á amerísku línunni hingað til en þeir henda helmingnum.

Jómfrúrblogg

Óhjákvæmilega hugsaði ég dálítið um hvert efni minnar jómfrúrfærslu ætti að verða. Niðurstaðan varð sú að ég myndi gera mest gagn með því að miðla til umheimsins nýrri uppgötvun sem ég gerði í gær. Brýnna erindi finn ég mér ekki í bili.

Ég á bifreið og þríf hana að jafnaði árlega hvort sem þess þarf eða ekki. Oft legg ég bifreið þessari í stæði fyrir utan heimili mitt. Stór ösp gnæfir þar yfir og hristir af sér brum, blöð og rauða drjóla (þetta er karlkyns ösp) og öllu þessu fylgja klessur af harpixi sem steingerast á bílnum. Ég hef lagt til atlögu við þær með ótal hreinsiefnum sem seld eru okurverði á bensínstöðvum og líka allskonar efnum, sem eru síst ætluð til bílþrifa og niðurstaðan er í aðalatriðum sú sama, harpixið haggast bæði seint og illa þó maður djöflist með tuskuna.

Ekki veit ég hvernig sú hugmynd fæddist en kannski var það þegar ég hreinsaði naglalakkið af mér fyrr um daginn með góðum árangri. Í ljós kom að naglalakkseyðirinn "Lemon" sem seldur er í Bónus við vægu verði, fjarlægir harpixið umsvifalaust og í gærkvöldi skemmti ég mér konunglega við að strjúka klessurnar af. Þær létu undan nokkurnveginn jafnauðveldlega og naglalakkið. Eftir því sem ég best get séð er lakkið á bílnum óskemmt þannig að hér hefur unnist fullnaðarsigur.

Sennilega gera sér ekki allir grein fyrir hversu mikilvæg uppgötvun þetta er. Hún getur auðveldað líf margra. Ég fór strax að hugsa um ýmsar merkar uppfinningar, sem hafa einmitt verið svo fagrar í einfaldleika sínum og komið til manna af einskærri tilviljun eins og gjöf frá æðri máttarvöldum. Svo fylltist ég miklum efasemdum um afrek mitt og hugsaði með mér að auðvitað væru allir aðrir löngu búnir að fatta þetta og trúlega væri ég síðust á jarðríki til þess.